Հանրաքվեն, 23 միլիոն եվրոն եւ ուշացող երկուշաբթին
ԱԺ ամբիոնից Գյումրիի անանցանելի փողոցների, իշխանությունների՝ բարեկարգ եւ լուսավորված քաղաք կառուցելու մասին խոստումները կբարձրաձայնեն պատգամավորները, սակայն ոչ Գյումրին եւ Շիրակի մարզը ներկայացնող:
Թվում էր՝ պետք է լիներ ճիշտ հակառակը: Այսօր պատգամավորների աթոռները զբաղեցնողները նախքան ընտրությունները՝ քարոզարշավի շրջանակներում ընտրողների հետ հանդիպումների ժամանակ մեկ անգամ չէ, որ բարձրաձայնել են այդ խնդիրը: Գյումրիի զարգացման իրենց պատկերացրած տեսլականը մշակելիս սեւով սպիտակի վրա գրել են այս խնդիրը գոնե բարձրաձայնելու պատրաստակամության մասին, ընդգծել, թե ինչ է պետք զբոսաշրջության զարգացման համար: Հետեւաբար այս հարցն առաջինն առանց համակարգող կենտրոնի կողմից հուշման եւ հորդորի, որ հարկավոր է զբաղվել, հարկավոր է հետեւողական լինել, իրենք պետք է նախաձեռնող կողմ դառնային, սակայն բախվեցինք անտարբերության եւ անգործության:
Համակարգող կենտրոնն այս ընթացքում նամակներ, տեղեկատվության ստացման հարցումներ է ուղարկել մի շարք կառույցների: Պատասխաններ ստացվել է կառավարության հասարակայնության եւ տեղեկատվության կապերի բաժնից, ՀՀ տարածքային կառավարման նախարարությունից, տեղական եւ մարզային կառույցներից: Պատասխաններում ընդհանուր առմամբ որոշակի ոչինչ չի ասվում: Միակ հարցը, որ պարզ է այսօր, դա հետեւյալն է՝ ամեն ինչ դեռեւս վերակառուցման եւ զարգացման բանկի հետ բանակցությունների փուլում է: Պարզ ասած՝ դեռ հայտնի էլ չէ՝ կհաստատի՞ բանկն այդ գումարը, թե՞ ոչ:
Կենտրոնն այս ընթացքում փորձում է նոր ուղիներ մշակել՝ հարցն իշխանությունների օրակարգում մշտապես պահելու համար, ստանալու հարցի պատասխանը, թե վերջապես երբ է գալու խոստացված երկուշաբթին: Քանի որ որքան ձգձգվում է այդ երկուշաբթին, այդքան ավելի անտանելի են դառնում Գյումրիի երկրորդական փողոցները:
Արմենուհի Վարդանյան
