Հեռավոր Կարմրավան գյուղում սաստիկ ցուրտ ձմեռներ են լինում, չկան տարրական կենսապայմաններ
Շիրակի մարզի Աշոցք խոշորացված համայնքի Կարմրավան գյուղում Սուսաննա Ավետիսյանի ընտանիքը 16 տարի ժամանակավորի կարգավիճակով է ապրում, որդին ու հարսը ուրիշի անասուններն են պահում, կթվորությամբ զբաղվում, որ երեք երեխաներին մեծացնեն:
Գյուղը Գյումրիից հեռու է 32 կմ, Աշոցք բնակավայրից՝ 2 կմ: Այստեղ սաստիկ ցուրտ ձմեռներ են լինում ու չկան տարրական կենսապայմաններ: Սուսաննա Ավետիսյանի որդին՝ Արտյոմ Ավետիսյանը, երկար տարիներ Ռուսաստանի Դաշնությունում ապրելուց հետո, որոշել էր հայրենիք վերադառնալ ու այն շենացնել: Նա 4 որդի ունի, 3-ը՝ անչափահաս:
Կարմրավան գյուղը, որտեղ ապրում է ընտանիքը, երբեք խնդիրների պակաս չունեցավ: Հանրային տրանսպորտ չկա, տարվա 7 ամիսը գյուղում ցուրտ է, տները ջեռուցել է պետք, վառելիք հայթայթելն էլ լուրջ խնդիր է: Եվ երբ այս ամենին գումարվում են հիվանդ մոր ու երեխաների հոգսերը, արդեն վիճակն անելանելի է դառնում:
