Տեսնում ես, որ ամեն ինչ քանդվում է, պետությունն է քանդվում. վավերագրություն հայկական Արցախի վերջին օրերից
«Վավերագրողները Արցախից» շարքի մեր հաջորդ հերոսը լրագրող Հայկ Ղազարյանն է, ով ակտիվորեն լուսաբանել է արցախյան իրադարձությունները՝ բլոկադա, սեպտեմբերյան պատերազմ, բռնի տեղահանում…
Ժամերի ընթացքում փլվեց պատերազմների, տարիների զրկանքների գնով կառուցված պետությունը, ասում է լրագրողը:
Նրա հիշողությունից չի ջնջվում այն պահը, թե ինչ զգաց, երբ Հայաստանի պաշտպանության նախարության հայտարարությունը կարդաց: Խոսքն այն արձանագրման մասին էր, որ Հայաստանի սահմաններին իրավիճակը կայուն է: Ճիշտ նույն պահին Արցախում իրենք ապրել-մեռնելու կռիվ էին տալիս.
«Մեղմ ասած ինձ վիրավորված զգացի, դավաճանված բառը չօգտագործեմ: Հասկացել եմ, որ հրաշքներ չեն լինում: Ամեն վայրկյան պայթյունի ձայներ էին լսվում, հասկանում էի՝ եթե չկանգնեցնես, պարզապես ցեղասպանություն է լինելու»…
Regions TV-ի հետ զրույցում Հայկը պատմել է բռնի տեղահանման ընթացքի մասին: Ինքը չայրեց իր տունը, դուռը չփակեց, գուցե ակնկալիքով, որ վերադարձ Արցախ լինելու է:
